Asli markii ay indhaha kala qaaday ayay ogaatay in wixii ay aragtay ay riyo waqti lumis ah ahayd. Xilligaas waxa la joogay kowdii duhurnimo, labada duhurnimana Cambaro iyo Aw Jaamac oo ahaa waalidkii Asli ayaa sida ay caadadu ahayd qado u soo qaadayey, Asli waxay ka werweraysay waalidkeedu marka ay yimaadaan qaybta daawooyinka in loo sheegi doono in halkan la keenay, markaasna ay wax waliba fashilmi doonaan.

"Alla abbahay isagaa is dilaaya, ama aniguu i dilayaa haddii uu i ogaado inaan uur leeyahay!! Alleylehe waa in aan cararo oo Cusbitaalka ka dhuunto" Ayay Asli ku fakareysay.

Aw Jaamac iyo Cambaro sidii caadada u ahaan jirtay duhur walba waxay isu soo raaci jireen Cusbitaalka si ay u booqdaan Asli oo labadooda indhood ay ka jeclaayeen. Markii la gaadhay waqtigii qadada ayaa waxa shaqadii ka yimid Aw Jaamac oo lalaadinaya Bac Xabxab iyo Liin Macaan ku jiraan, dabadeedna wuxuu yidhi "Anigu galabta iskaa wax u qabso ayaan u noqonayaa Asli u geeya qadada, khudaartana u miira aad ayay u anfacaysaaye, iguna salaan una sheeg in aan caawa oo dhan aan la joogi doono iyo in aan akhbaar iyo hadiyad uga hayo walaalkeed Cali-Ammuur".

Aw Jaamac markii qadadii uu afka ka qaaday buu jaanta rogay, wuxuuna tagay xaafadda Wadajir oo uu ka socday dhismaha Dugisyada Waxbarashada Khasabka ah. Cambaro kama ay dambayn waxa badan Aw Jaamac waxayna u soo ambabaxday Cusbitaalka Digfeer.

Cambaro iyo Kuusey ayaa iyagoo faraxsan oo qoslaaya soo galay qaybtii daawooyinka ee Cusbitaalka Digfeer wax yar ka dibna waxay Cambaro dalaq tidhi qolkii ay ku ogeyd Asli, hase yeeshee markii ay aragtay sariirtii Asli oo haweeney kale ku huruddo, Ayay is moodsiisay oo ay la noqotay in ay marin habowday oo qolkii gaftay, hase yeeshee intii aanay dib uga noqon ayay waxay garatay Muslimo oo madaxa la soo kacday in muddo ahna jiiftey sariirtii Asli ku dhegganeyd, Cambaro dib ayey isla qolkii ugu noqotay markii ay Muslimo xaggeeda u dhaqaaqeysayna waxay ka il buuxsatay dadka qolka jiifay oo badh garatay.

Cambaro oo yaabban ayaa Muslimo ku tidhi "Walaal iska warran! Meeday Asli, maxaa ku dhacay, inaan qolkii gafay ayaan mooday oo anoo dib u noqon raba ayaan ku arkay".

Markii Muslimo u hollatay oo damacday inay Cambaro u sheegto Asli iyo wixii ku dhacay, ayaa waxaa si lama filaan ah u soo gashay Kalkaaliso Cadar oo intay Cambaro gacanta qabatay ku tidhi "Eeddo … Asli waxaa loo beddeley qaybta naga korreysa, qolka 25ad ee orod u tag". Intii aanay Cambaro ka bixin qaybtii daawada ayaa Muslimo ka daba timid una sheegtay in Asli Uur ku soo baxay awgeed loogu beddelay qaybta haweenka.

Cambaro ereygaasi wuxuu uga dhignaa falaadh sumaysan oo wadnaha ka abaartay, waxaana ka dhacay jeegii caanaha ahaa oo ay gacanta ku haysay, waxa qooyey dhidid hadalkiina wuu ka soo bixi waayay.

"Alla goblamayeey!! Alla goblamayeey!!! In ay ii saqirirto ayaa la ii qaatay", Cambaro oo ku barooraneysa ayaa intay Kuusay gacanta soo qabatay ku tidhi "Naa intaad cuntada haweenka jirran u kala qaybisid ina keen gurigey ayaa ba’aye"!!!

Shanqadhii alaabtii iyo baroortii Cambaro ayaa laga maqlay qaybihii u dhowaa oo dhan, waxaana dadkii ku soo xoomay goobtii oo buuq ka bilaabmay. "Gabadheedii ayaa uur ku soo baxay, maxay u ceshen wayday iyo ma gabdhaha waqtigan jooga ayaa haddii aanay iyagu is dhowrin la celin karaa", muran ah ayaa dhinac kasta ka yeedhay.

Cambaro oo aad moodeysid in wadkeedii loo soo sheegayayaa u soo luuday albaabka cusbitaalka oo ay durbadiiba Tagsi ka raacday. Kuusay markii ay aragtay in Cambaro ka tagtay ayay dib u soo noqotay, waxayna u tagtay Asli oo markii ay Kuusay aragtay naxdin la soo boodday.

-Iska warran yaa kula socda?

-=Habaryar Cambaro ayaa ila socotay.

-Oo meeday?

-Albaabka ayey ka noqotay iyadoo barooraneysa ayayna Tagsi raacday.

Asli warkaas wuxuu ku gilgilay leebkii hore ugu tagnaa, waxay cusbooneysiisay urugadii iyo ilmadii, waxayna iyadoo hinraageysa tidhi, "Alla see ayaan yeelaa Hooyo iyo Aabo wey ogaadeen, bal yaa u sheegay!!!".

Kuusay oo samiirsiin iyo dejin ula jeedda kana naxsan jirrabka haysta Asli ayaa ku adkeysay in ay dulqaadato iyadoo ku tidhi "Dhibayaatada kugu dhacday sanooyin bey kaa weyn tahay, sidii Alla ka dhigo Ayayna noqon".

Cambaro oo meeshii laga saraa aysan dhiig lahayn oo Ilmadu ka dhammaatay, ayaa gurigi soo gashay iyadoo tagsiilihii keenay u garabka hayo, wuxuna Suuban oo reer Aw Jaamac ay deris ahaayeen u sheegay in Cambaro besteed tahay una baahan in sariirteedii la jiifiyo si ay u nasato.