Maamulka Dooxada Shabelle oo sheegey inay qabteen gaari hub u siday Al Shabaab iyo ragii waday
Maamulka Dooxada Shabelle ee gobolka Hiiraan ayaa waxa ay sheegeen inay gacanta ku dhigeen rag iyo gaari saarnaa hub oo loo waday Xarakada Al Shabaab.
Wasiirka Warfaafinta Maamulka Dooxada Shabelle Max’ud Nuur (Cago joof) ayaa waxaa uu sheegay inay gacanta ku dhigeen gaari hub u siday Xarakada Al Shabaab oo ku wajahnaa Magaalada Baladweyne Xarunta gobolka Hiiraan
Max’ud Nuur ayaa waxaa uu tilmaamay in gaariga ay saarnaayeen hub kala duwan oo isugu jiray qoryaha loo yaqaano Dhashiikaha iyo qoryo kale, wuxuuna tilmaamay in xilli habeen ah laga qabtay nawaaxiga deegaanka Ceel-gaal ee gobolka Hiiraan, isagoo intaasi ku daray in baaritaan ay ku hayaan gaariga hubka sida iyo ragga la socday.
Wasiirka Maamulka Dooxada Shabelle ayaa waxa uu dhinaca kale ka hadlay shir Magaalada Cadaado ee gobolka Galgaduud ugu furmay qaar ka mid ah Maamul goboleedyada ka jira dalka, isagoo tilmaamay in xilligaani aysan habooneyn shirkaasi, maadaama uu tibaaxay in dalka ay ka jiraan dhibaatooyin farabadan loona baahanyahay in la samata bixiyo
