Iska horimaad hakad galiyay isku socodka gaadiidka iyo dadweynaha ee qeybo ka mid ah wadada warshadaha ee Magaalada Muqdisho waxaa uu ku dhexmaray Ciidamo ka tirsan dowladda Soomaaliya iyo kuwa Al Shabaab.

Iska horimaadkaani oo dhexmaray ciidamada dowladda iyo Al Shabaab ayaa waxaa uu ka dhacay wadada Warshadaha gaar ahaan agagaarka Kulyadii Jaalle Siyaad ee Magaalada Muqdisho.

Wararka ayaa waxaa ay sheegayaan in ciidamo ka tirsan Al-Shabab ay weerar ku soo qaadeen shaqaale ay leedahay dowladda Soomaaliya gaar ahaan Wasaarada arimaha gudaha kuwaasi oo dayactir ku sameynayay qeybaha ay ka bur bursantahay wadadaasi.

Afhayeenka Wasaarada Warfaafinta xukuumada Soomaaliya Sheekh C/risaaq qeylow oo kadib iska horimaadkaasi la hadlay ayaa sheegay in shaqaalihii dowladda ee dhisayay wadada kaliya ee isku xirta Muqdisho inteeda kale iyo Suuqa Bakaaraha ay soo weerareen ciidamada Al Shabaab oo uu ku eedeeyay in dhawaan ay halkaasi ku aaseen Miino dad rayid ah dhameysay.

Intii iska horimaadkaasi uu socday ayaa waxaa guud ahaan istaagay isku socodka gaadiidka iyo dadweynaha ee isticmaalayay wadadaasi, walow markii dambe ay dib u furantay.