Taliska ciidamada badda Iran oo sheegay iney bad baadiyeen markab shidaal siday
Markab nooca dagaalka ah oo ay dawlada Iran leedahay ayaa ka bad baadiyay burcad badeedda Soomaaliyeed markab nooca shidaalka qaada oo Iran laga leeyahay oo ay damacsanaayeen inay qafaashaan xilli uu mrayay biyaha badda cas.
Taliska ciidamada badda ee wadanka Iran ayaa sheegay in mid ka mid ah maraakiibtooda dagaalka ee ku sugan biyaha Soomaaliya uu ka hor tagay fal ay burcad badeedda Soomaalidu ku doonayeen inay ku qafaashaan markab shidaal sida oo marayay gacanka Baabul Mandab ee badda cas ku yaala.
Taliye ku xigeenka ciidamada badda wadanka Iran Admiral Seyyed Mahmoud Mousavi ayaa u sheegay warbaahinta dalkiisa in koox burcad badeed Soomaali ah oo wadatay doonyo dheereeya kana koobnaa illaa iyo 35 ruux ay weerar ku qaadeen markabka shidaalka hase ahaatee ay ka gaareen ciidamo gaar ah oo dul saarnaa markab dagaal oo badweynta badda cas dul taagan.
Is rasaaseyn dhex martay ciidamada iyo kooxda burcad badeedda ah ayaan la sheegin wax khasaaro ah oo ka dhashay hase ahaatee kooxdii burcad badeedda ayaa baxsaday sida taliska ciidamada badda wadanka Iran laga soo xigtay.
